Xoias na Biblioteca

A Biblioteca da ETSAC incorporou ao seu fondo bibliográfico unha xoia bibliográfica do século XIV, unha edición facsimilar da Cronica Geral de Espanha de 1344 que conserva a Biblioteca da Academia das Ciencias de Lisboa. A obra está escrita en galego-portugués da época e narra a historia mitolóxica das distintas cidades de España, entre elas a de A Coruña. O códice relata a loita entre Hércules e Fadeón e como o primeiro gaña e decide construir o faro que leva o seu nome e sobre o que naceu unha vila.

O exemplar pesa 25 kilos, ten 648 páxinas e 1.300 imaxes iluminadas en oro, co texto escrito en letra gótica distribuida en dúas columnas de 42 liñas. Está impreso en pergamino especial, co mesmo grosor, tacto e olor có exemplar orixinal, e encadernado en pergamino e cosido con cordel de cánamo.